Tshiṱori nga Elmon Tshikhudo. Ṱhalutshedzo nga Khathutshelo Raliphaswa.
Mutambi wa mavili kha khethekanyo ya vhaswa na vhane vha khaḓi pfumbudzwa ane a vha na vhuimo ha nṱha Worship Chauke, o vhuya hayani o ḓala dakalo nga murahu ha u lwa a wana gundo kha vhuṱaṱisani ha mitambo ya mavili ha Afrika ngei shangoni ḽa Guinea, he a amba uri ndi medala ya musuku kha tshipiḓa tsha vhaswa tsha 80kg.
Muthannga wa minwaha ya 17 fhedzi ane a bva Hamalamulele B2, mugudi wa Gireidi ya 12 tshikoloni tsha Sekondari tsha Malamulele, o kunda vhakhedu vhawe vhavhili - munwe u bva shangoni ḽa Guinea, we nndwa yawe ya imiswa nga malogwane, na munwe a tshi bva shangoni ḽa Libya, we a vha a tshi mu fhira kha dzi phoindi. Mitambo yoṱhe ya miṱaṱisano yovha yo farelwa Guinea lwa maḓuvha a fumi u bva nga ḽa 16 u swika nga ḽa 26 Shundunthule.
Chauke zwino u ḓihudza nga rekhodo ya amateur i mangadzaho ya u kunda nga 23 nahone o kundwa luvhili fhedzi kha nndwa dza 25, nahone u amba uri u na ṱhuṱhuwedzo khulwane zwa zwino u fhira ngei murahu.
Chauke ndi murado wa kiḽaba ya Makhoma Boxing ine ya wanala hayani hawe Hamalamulele, nga fhasi ha vhurangaphanḓa ha mugudisi Vho Hlonipho Maboko. O swikelela u ya kha thonamennde iyi ya Guinea nga murahu ha u wina kha mbambe dza lushaka kha tshigwada tsha 80kg ngei Tzaneen ṅwaha wo fhiraho wa 2024.
Kha nyambedzano na vha nyanḓadzamafhungo ya Limpopo Mirror, Chauke o vha o ḓala fulufhelo nga murahu ha musi o no vhuya hayani ubva Guinea. "U tamba hanga kha vhuṱaṱisani ho sumbedza uri a thi fhasi ha muṅwe mutambi wa mavili u bva kha maṅwe mashango. Hezwi zwo ṱuṱuwedza vhuḓifari hanga na fulufhelo ḽanga, nahone ndo ṱuṱuwedzea vhukuma u itela u isa mutambo wanga kha luṅwe luṱa. Pulane yanga ya vhumatshelo ndi u bvela phanḓa na u tamba mutambo wa mavili kha ḽeveḽe ya vhatambi vhaṱuku na u vha na vhutsila musi ndi na miṅwaha ya 19," a amba ngauralo.
Kha nḓila ye a dzhena ngayo kha zwa mavili, Chauke o khoḓa mukomana wawe. "Mukomana wanga Blessing o vha e mutambi wa mavili nahone o vha a tshi ntakadza nga vhugudisi hawe. Ndo dovha nda funa zwiambaro zwawe zwa mavili. Hezwi zwo nṱuṱuwedza, nahone ndo ḓivhudza uri ḽiṅwe ḓuvha ndi ḓo tevhela nau swikelela hune avha hone. Ndi khou tshila muloro wanga," o ralo.