Tshiṱori nga Elmon Tshikhudo. Ṱhalutshedzo nga Khathutshelo Raliphaswa.
Tshigwada tsha maanḓa vha muzika wa gospel vho winaho dzi pfufho nnzhi, Worship House, vho zwi ita hafhu nga u kuvhanganya pfufho tharu nga tshifhinga tsha Pfufho dza Muzika wa Gospel wa Crown dza ṅwaha nga ṅwaha dza vhu 17. Pfufho idzi, dzine dza dzhiela nṱha vhukoni ha muzika wa gospel, dzo farelwa sentharani ya mabuthano ya Gallagher ngei Midrand nga ḽa 25 Ḽara .
Tshigwada itshi tsho thomiwa nga muhashi wa kale wa radio, Vho- Bishop Isaac Dagada nga 2003, tshigwada itshi tshi re Limpopo u bva tshatshetsho tsho bvisa albamu nnzhi dza muzika wa gospel wa maanḓa na mafulufulu a nṱha, wo imbiwaho nga nyambo dza Afrika Tshipembe dza hafu ya fumi-na-mbili.
Khwairi, ine ya vha na pfufho dza Crown Gospel dza ṱahe kha khabinethe yayo, nga u ḓikukumusa yo dzhia hayani "Pfufho ya Tshigwada tsha Evangeli ya khwine ," "Pfufho ya Luimbo lwa thendo lwa khwine" na "Luimbo lwa Evangeli lwa khwine lwa ṅwaha" lune lwa funeswa vhukuma lwa Africa.
Tshithu tshihulwane tsha vhusiku ho vha u tamba ha khwairi kha pfufho, he vha sumbedza vhukoni havho vhu sa vhambedzwi na tshithu na lutamo lwavho lwa vhuḓi nḓala.
Muṅwe wa vharangaphanḓa vha tshigwada na muraḓo wa vhatumbuli, Boitumelo Sejeng, vhane vha ḓivhiwa khwine sa Tumi B, vho ṱalusa pfufho dzavho dza zwenezwino sa tshiṅwe tshiitea tshihulwane kha ḓivhazwakale ya tshigwada itshi tsha Worship House.
Vho amba uri luimbo lwo winaho, Africa for Jesus, lwo bviswaho nga Nyendavhusiku 2023, lwo vha lu tshi fhira luimbo fhedzi. "Zwo vha zwi tshi swaya mathomo a ndima ntswa kha riṋe sa tshigwada. Luimbo lwo shuma sa tshiṱirathedzhi tsha u thoma tsha u renga ha aḽibamu yashu ya zwenezwino, Worship House 20 Celebration ngei Limpopo, ye ya thoma u bvelela nga Ṱhafamuhwe ṋaṅwaha. Mushumo uyo wo khetheaho u humbula lwendo lwa khwairi lwa miṅwaha ya mahumi mavhili lu swayeaho kha tshikhala tsha muzika wa gospel, lwendo lune lwa ṱaluswa nga u phaḓaladza fulufhelo na u ṱuṱuwedza mimuya nga kha nyimbo dzashu dza gospel dzi re na maanḓa," vho amba.
Tumi B o isa phanḓa na u sumbedza uri zwe vha zwi swikelela zwenezwino zwo ita uri mutumbuli, Bishop Isaac Dagada, a takale vhukuma. "Mubishopo o mangadzwa nga yeneyi mvelelo. U kunda pfufho dzoṱhe tharu dze ra nangiwa khadzo a si tshiṅwe tshithu nga nnḓa ha tshilidzi," Tumi B a amba.