Tshiṱori nga Kaizer Nengovhela. Ṱhalutshedzo nga Khathutshelo Raliphaswa.
Vhagudiswa vhararu vha nṱha vha maṱiriki Limpopo vha 2024 vha bva kha tshiṱiriki tsha Vhembe, tshe na tshone tsha bveledza zwikolo zwiraru zwa nṱha zwa nnyi na nnyi zwo ḓisendekaho kha u phasa ha bachelor sa tshikalo. Zwiṅwe hafhu, Vhembe ndi haya ha tshikolo tsho ḓiimisaho nga tshoṱhe tshe tsha bveledza dziphasi dza bachelor nnzhi kha vunḓu.
Naho zwo ralo, ṅwaha uno a si vhuḓidini ha muthu nga eṱhe fhedzi he ha tswa ṱhogomelo musi hu tshi ḓivhadzwa mvelelo dza maṱiriki. Kiḽasi ya 2024 yo khwinisa kushumele kwayo nga phesenthe dza 5.5 musi i tshi vhambedzwa na ṅwaha wo fhiraho, hune 85.1% ya vhagudiswa vha maṱiriki vho phasa.
MEC wa muhasho wa pfunzo vunḓuni fhano Limpopo, Vho Mavhungu Lerule Ramakhanya, vho ḓivhadza mvelelo lwa tshiofisi nga ḽa 14 Phando hodelani ya The Ranch, nnḓa nyana ha Polokwane. Vho livhuwa vhabebi na vhaunḓi vhe vha tikedza na u ṱuṱuwedza vhana vhavho nga tshifhinga tsha ndeme tsha milingo.
Vho Ramakhanya vho ombedzela uri mushumo wa vhabebi a wo ngo fanela u dzhielwa fhasi, sa izwi u wa ndeme kha u tikedza na u khwaṱhisa maitele a u funza na u guda. "Mvelelo dzo swikelwaho nga vhagudiswa a dzo ngo itea nga khombo kana nga mashudu. Ndi mvelelo dza u shuma nga maanḓa, vhuḓidini na u ḓikumedzela. Vhadededzi kha vundu iḽi vho ḓikumedzela nga nḓila dzine dza fanela u vha tsumbo kha mushumo wavho woṱhe, nahone ri livhuwa vhukuma miṋeelo yavho ya u sa ḓiṱoḓela zwavho," vha amba MEC.
Mulangavunḓu wa Limpopo Vho Dokotela Phophi Ramathuba vho sumbedzisa zwilinganyo zwo ṱanganedzwaho nga Muhasho wa Pfunzo, zwine zwa katela u ḓiṋekedza, u fulufhedzea, u pfela vhuṱungu, u shuma nga nḓila kwayo, u sa ṱalula, vhukoni, u shuma sa tshigwada, na u pfela vhuṱungu sa milayo i livhisaho kha bono ḽavho na zwiito zwavho. "Ro ḓiimisela u litsha u guda vhuholefhali na u ṱanganedza u shuma nga maanḓa. Ri ḓo guda kha zwa kale zwashu na u khwinisa vhungoho hashu ha zwino. U bvelela haṋu na zwine na zwi swikelela ṋamusi zwi sumbedza u ḓikumedzela hashu kha u isa phanḓa zwilinganyo zwa pfunzo zwine zwa vha zwa ndeme kha mbofholowo yashu sa muthu nga eṱhe na sa lushaka," vha engedza.
Vhagudiswa vhararu vha nṱha kha vunḓu vhoṱhe ndi vha Tshiṱiriki tsha Vhembe Vhubvaḓuvha:
1 – Nzumbululo Todani u bva Tshikoloni tsha nṱha tsha Mbilwi.
2 – Lalamani Maselesele u bva tshikoloni tsha nṱha tsha Tshivhase.
3 – Nkateko Mushwana u bva tshikoloni tsha nṱha tsha EPP Mhinga.
Sa zwe zwa ṱoḓou vha mvelele, Tshikolo tsha nṱha tsha Mbilwi tsho ḓivhadzwa sa tshikolo tsha nnyi na nnyi tsha khwinesa kha vunḓu ho sedzwa kha u bveledza dzi bachelor, tsho bveledza dzi bachelor dza 307. Tshikolo tsha nṱha tsha Thengwe tsho tevhela nga dzi bachelor dza 234, ngeno tshikolo tsha nṱha tsha Dzata tsho dzhia vhuimo ha vhuraru nga bachelor dza 220. Zwoṱhe hezwi zwikolo zwi wanala kha Tshiṱiriki tsha Vhembe Vhukovhela.
Musi vha tshi vhudziswa nga ha tshiphiri tsha mvelelo dzavhuḓi, ṱhoho ya tshikolo tsha Mbilwi High, Vho Cedrick Lidzhade, vho khoḓa vhuḓikumedzeli ha vhadededzi na vhagudiswa. "U dzhenelela ha vhakwamei vhoṱhe, hu tshi katelwa vhabebi, miraḓo ya SGB, na vharangaphanḓa vha mvelele, zwo dovha zwa shela mulenzhe kha kushumele kwavhuḓi," vho ralo.
Kha khethekanyo ya zwikolo zwo ḓiimisaho nga zwoṱhe, gudedzi ya New Era ngei Vhembe Vhubvaḓuvha, i re na vhagudiswa vha 436, yo swikelela 230 ya dza bachelor.