Tshiṱori nga Kaizer Nengovhela. Ṱhalutshedzo nga Khathutshelo Raliphaswa.
Khuḓano khulu vhukati ha vhadzulapo vhamivhundu ya Hakutama na Thovhele vha mivhundu iyo yo tutuwa hafhu. Vhadzulapo vho vala magethe a ofisini dza khoro nga Musumbuluwo wa ḽa fumi-ṱhanu, vha tshi thivhela vhashumi uri vha si dzhene.
Vhadzulapo vha Kutama vhovha vho sinyuwa vha vala bada ya D3715 na bada ya R522 dzi bvaho Sinthumule na Louis Trichardt u ya Vivo. Vhupo uho ho ḓou ima tshumelo dzoṱhe, hone na zwikolo zwa valwa. Vha vhuendi navho vho imiswa u endedza vhathu sa nga misi.
Vhagwalabi vho thivha bada vha tshi shumisa matombo na zwiṅwe zwishumiswa zwa vhuleme. Vhagudiswa vha zwikolo zwa vhupo uho vho hanelwa nḓila dza uya zwikoloni lwa maḓuvha a swikaho mararu.
Nga ṅwedzi wa Lambamai ṅwaha uno, ho dzudzanywa muṱangano nga vhadzulapo vhau fhambana vhe vhavha vha khou ṱahisa zwililo na mbilaelo dzavho malugana na nḓila dzine murangaphanḓa wa sialala vhuponi uho, Thovhele Vho Vele Kutama vha tshimbidza ngadzo kha mafhungo a urengisa mavu atshitshavha. Thovhele vha khou pomokwa zwauri vho rengisa mavu a zwa vhulimi a tshitshavha vha songo ranga uvha na therisano na vhadzulapo. Vho ḓou dovha hafhu vha ingiwa nga u pomokiwa uvha na nḓila dzi songo ṱanganedzeaho dza vhufhura.
Muambeli wa komiti yavhadzulapo vhaha Kutama, Vho Simon Sirunwa, vho amba zwauri vhafaramikovha kha siviki ya muvhundu uyo na vha masipala vho tou mangadzwa musi vha tshi vhudziwa zwauri tsimu kana bulasi idzo dza tshitshavha dzo rengiswa. Vho Sirunwa vho amba zwauri vho ḓou ya kha Thovhele, fhedzi vha kundelwa u vha nea zwidodombedzwa na phindulo nga vhuḓalo kha mbudziso dze vhavha vhe nadzo khavho.
Muṅwe wa vhadzulapo Vho Alugumi Muofhe vho ṱahisa zwauri vha na mbilaelo dzauri mugwalabo uyu wo thithisa vhagudiswa zwikoloni. "Sa vhadzulapo vho kwameaho nga zwine zwa khou itea, ro takala uri khumbelo yashu yauri vhana vha tendelwe uya zwikoloni yo pfiwa," vha amba.
Thovhele Vho Kutama vho amba zwauri vha khou vhilaedzwa nga vhathu vhane vho ḓi dzhenisa kha mugwalabo, zwihulu nga zwiito zwine zwa khou thithisa tshumelo dza zwikoloni. "Ahuna zwine nda zwi ḓivha kha zwine vha khou ngambela zwone. Kha hoyu muvhundu, ri na nḓila dzine ra shumisa u tandulula dzi thaidzo dzine ravha ri khou ṱangana nadzo, hone ri ṱoḓa u vhona zwithu zwi tshi tshimbila nga ngona. Zwithu zwoṱhe zwi itwa nga nḓila ya tshidele ubva fhasi uya nṱha. Vhathu vhane vhavha na thaidzo ndi tshigwada tshiṱuku vhane vha khou thithisa shango," vha amba.
Thovhele vho dovha hafhu vha amba zwauri avho vhane vha ṱoḓa u vhona vha tshi ḓi rula mushumo vha fanela uya musanda sa izwi vho khethwa kha vha Musanda, vha songo khethwa nga vhadzulapo fhedzi.