Ndinae u na vhumatshelo havhuḓi kha zwa vhutsila.

Tshiṱori nga: Kaizer Nengovhela. Ṱhalutshedzo nga: Khathutshelo Raliphaswa.

Ndinae Nethivhodza ane a touvha na minwaha ya fumi-na-ina a bvaho Khalavha ndi muthannga ane anga vhalwa kha vhatsila vhaṱuku vha u mona na Afrika Tshipembe. Lufuno lwawe kha u ola lwo thoma sa nḓila ya u ḓi mbvumbvusa musi hu si na zwine a khou ita, izwo ndi musi a kha murole wa vhurathi tshikoloni tsha fhasi tsha Khalavha a tshi ola zwithu zwa u fhambana. “Ndo ṱuṱuwedzwa u bvela phanḓa na u ola nga mugudisi wanga vhe vha vhona vhutsila hanga,” a amba.

Ndinae zwa zwino ndi mugudiswa wa murole wa vhumalo tshikoloni tsha nṱha tsha Phiriphiri, hune a fhedza vhunzhi ha tshifhinga tshawe a tshi ola vhathu vhane vha vha vho rapolotiki, mitambo, mabindu, nz. O no ola vhathu vha fanaho na Siya Kolisi na muphuresidennde Vho Cyril Ramaphosa.

Dzangalelo ḽawe ḽa vhutsila ḽo mu ṱuṱuwedza uri a thome u dzhenelela miṱaṱisano ya vhutsila. O dzhenelela muṱaṱisano wawe wa u thoma mathomoni a ṅwaha uno wa vhagudiswa vha vhupo ha Nzhelele, he a vha kunda vhoṱhe. “Ndo kunda kha vhagudiswa vha paḓaho furaru. Nga ṅwedzi wa Ṱhangule ṅwaha uno, ndo dzhenelela muṱaṱisano wa Edgars Self-Potrait ngei Thohoyandou hune ndo lindela dzi mvelelo dzawo, hone ndi na fulufhelo ḽauri ndi ḓo shuma zwavhuḓi,” a engedza.

U shumisa penisela ya xale na raba ya u thutha. Ene uri: “Zwa zwino ndi khou ṱahelelwa nga zwishumiswa u fana na dzi bulatsho, penisela dza mivhala na zwiṅwe zwinzhi. Ndi takalela u ola nga ha zwine nda ṱangana nazwo, ndi zwone zwine vhatsila vha zwi vhidza 'vhutsila ha u vhona’. Muthu ha faneli u ya kule uri a kone u ṱuṱuwedzea nga zwine nga ola, fhedzi naho zwo ralo zwi a mbvumbvusa. Ndi tou fhedza maḓuvha a sa swiki vhege u fhedza u ola tshivhumbwa.”

Ndinae u tama u gudela zwa vhutsila na u bveledza musi a tshi ya magudedzini a nṱha. Muloro wawe ndi uvha muoli makone ane una phera yawe ya vhutsila.

Vho Thivhulawi, vhane vha vha khotsi awe, vhari vhutsila hawe vhu avha mangadza misi yothe. “U tshe ṅwana kha zwa vhutsila, ndi tenda uri u kha ḓi tea u thuswa u alusa vhukoni hawe. U tshe na lwendo lu lapfu uri a wedze ndoro dzawe, hone u na thikhedzo yanga. Ndi ṱoḓa u mu wanela gudedzi ḽa u mu thusa u guda u ṱuṱula vhutsila hawe,” vha amba.

Date:15 November 2023

By: Kaizer Nengovhela

Kaizer Nengovhela started writing stories for Limpopo Mirror in 2000. Prior to that he had a five year stint at Phala-Phala FM as sports presenter. In 2005 Kaizer received an award from the province's premier as Best Sports Presenter. The same year he was also nominated as Best Sports Reporter by the Makhado Municipality. Kaizer was awarded the Mathatha Tsedu award in 2014.

Read: 178