Uvha hone ha mufhiso wo kalulaho kha zwipiḓa zwinzhi zwa shango, ho katelwa na vhupo ha Vhembe, vhathu vhanzhi vha khou vhonala vha khouya madamuni na milamboni u fhungudza mufhiso zwine zwavha nḓila dzo ḓoweleaho, zwihulu kha vhupo ha mahayani.

Vha muṱa wa ha Chauke ngei Dopeni, Nzhelele vha tshe vho akhamadzwa na uḓi vhudzisa mbudziso nnzhi dzisina phindulo nga murahu ha u thuntshwa ha vhulawa muraḓo wa muṱa wavho nga Ḽavhuṱanu, ḽa fumi-sumbe Ḽara.

Muloro wa  Issac Modipa a bvaho Tshiozwi, wa uvha mulugisi wa zwiendedzi, u vhonala wo wedza. Issac a tshi aluwa ovha o tama uvha mulugisi na u bveledza zwiendedzi nga nḓila yawe. Fhedzi nga u shaya masheleni hayani, izwo zwo konḓa uri a wedze muloro wawe. O touvha mashudu a tshi swika kha u shumisa dzi ḓaraṱa u bveledza zwishumiswa, zwine a rengisa na u kunga vhathu ngazwo hayani hawe.

Mutsila Bono Dzivhani a bvaho Tshivhulani, nnḓa ha Sibasa, u vhonala o wana nḓila ya u ḓi fhodza kha tshenzhemo i konḓaho ye a ṱangana nayo sa mupondiwa we a tshipiwa minwaha mivhili yo fhiraho. U tshipiwa zwo mu sia na mbonzhe muvhilini na muyani. Bono u shumisa vhupfiwa hawe u bveledza vhutsila, na u ṱahisa uri vhutsila vhu a kona u thusa muthu u fhola kha zwine a khou ṱangana nazwo.

U phaḓaladzwa ha mafhungo asi one kha zwileludzi zwa vhudavhidzani, azwi siki nḓaḓo fhedzi kha vhathu, zwi dovha hafhu zwa vhaisa vha kwameaho nga mafhungo ayo asi one. U phaḓaladzwa ha mafhungo asi one zwi kwamaho musidzanyana we a ḓo tambudza munwe mugudiswa ngae ngei tshikoloni tsha Mbilwi minwaha mivhili yo fhiraho, o fhedza oḓi haṱula vhutshilo.

Nyalunako e a dzhenelela muṱaṱisano wa vhonyalunako wa Miss Teen Afrika Tshipembe, Tshepiso Mphidi a bvaho Haradali, uri vhasidzanyana vha fanela u ṱutshela zwa uvha na vhushaka ha u funana na vhathu vhahulwane vhane vha vhidzwa “Sugar daddy” zwine zwavha zwo vhangiwa nga mutsiko wa u ṱoḓa u fana na ṱhama dzavho. Uri ndi khwine u vha vhona vho sedzana na pfunzo dzavho uri vha kone uḓi fhaṱela vhumatshelo havhuḓi. Muṱaṱisano wa Miss Teen Afrika Tshipembe u ḓo farelwa State Theatre ngei Pretoria nga ḽa fumi-rathi Nyendavhusiku ṅwaha uno.

Muhashi wa Phalaphala FM ane a dovha avha muṱuṱuwedzi kha vhudavhidzani ha TikTok Mutsitselwa Mureri u khou ḓi sikela dzina kha nḓowetshumo ya maṅwalo. Mutsitselwa o pfufhiwa kha pfufho dza Book Behind kha tshiteṅwa tsha bugu ya khwine ya luambo lwa Tshivenda. Idzo ndi pfufho dzine vha dzhiela nṱha vhaṅwali vhane vha shumisa nyambo dza ḓamuni dzofhambanaho. Pfufho yawe ndi ya kha bugu yawe ya Mbuno dza Lufuno. Vhuṱambo ha pfufho ho farelwa ngei Pietermaritzburg nga Mugivhela wa ḽa fumi-na-thihi, dze havha hu khou tou khethwa vhathu nga tshitshavha.

Kha dziṅwe dza dzi khuḓano dza miṱa ya musanda, ndi u bviswa ha Thovhele vha vhupo ha Dzanani khala Nzhelele.

Kha tshiwo tshe tsha mangadza vhadzulapo na u sia vhanzhi vhe na dzi mbudziso u fhira dzi phindulo, ndi musi munna wa pholisa we avha a khou kaidzelwa phosho ya radio o swika he a thuntsha a huvhadza mune wa fhethu hune a dzula hone. Tshiwo tsho bvelela nga Musumbuluwo ngei Makwarela, tsini na Sibasa.

Mavhengele tserekano a Elim vha husumba honovha  tshivhilelana tsha u ṱangulwa nga mavemu, izwi ndi nga murahu ha tshiwo tshe tsha bvelela kha vhengele ḽa Ackermans nga Sondaha ya fumi-ṱahe. U ṱangulwa uho ho bvelelwa nga matsheloni nga awara ya vhufumi he vha ṱangula ṱhingokhwalwa dze dzisi bulwe tshivhalo.

Mavhengele a dzi ṱhunḓu ndi ane vhathu vhanzhi vhovha vha tshi ḓi tika ngao na u a fulufhela kha vhupo ha mahayani. Fhedzi iḽo fulufhelo kha mavhengele ayo ḽo ḓou shanduka musi vhathu vhatshi vho ṱahisa dzi mbilaelo nga ha u rengiselwa zwiḽiwa zwine zwo no fhirelwa nga tshifhinga, na zwine a zwiho mulayoni.

Ronewa Mufunzwa wa minwaha ya fumbili-na-thihi o ḓi imisela u ḓisa tshanduko na u ṱuṱuwedza vhanzhi nga u shumisa buḓo ḽawe sa ralunako. Ronewa ndi musidzanyana a bvaho kusini kwa Tshishivhe, hone zwa zwino o pfufhiwa uvha ralunako wa khwine wa vhuvhili kha muṱaṱisano wa Miss Leaders Ignite and Manifest wa nwaha uno. Vhuṱambo uho ha vhonyalunako hovha ho farelwa Bloemfontein nga ḽa furaru Khubvumedzi ṅwaha-uno.

Muṅwali wabugu dza zwirendo wapo makone Rudzani Eric Mmbengwa a bvaho Havhangani, o anḓadza khuvhanganyo yawe ya zwirendo zwa Tshivenda ya u thoma, ine ya vhidzwa Nngwedzamilambo. Yo anḓadza nga ḽa fumbili-malo Tshimedzi, ndi ine yavha na zwirendo zwa fuiṋa-na-mbili.