Mavhengele a dzi ṱhunḓu a khou ṱolwa.

Tshiṱori nga: Maanda Bele. Ṱhalutshedzo nga: Khathutshelo Raliphaswa.

Mavhengele a dzi ṱhunḓu ndi ane vhathu vhanzhi vhovha vha tshi ḓi tika ngao na u a fulufhela kha vhupo ha mahayani. Fhedzi iḽo fulufhelo kha mavhengele ayo ḽo ḓou shanduka musi vhathu vhatshi vho ṱahisa dzi mbilaelo nga ha u rengiselwa zwiḽiwa zwine zwo no fhirelwa nga tshifhinga, na zwine a zwiho mulayoni.

Mavhengele ayo a dzi ṱhunḓu, ane vhunzhi havho ndi vhathu vha bvaho Ethiopia na Somalia, vhane vhathu vha vha vhidza “my friend”, vhovha vha tshi tikedzwa nga vhathu zwihulu ngauri na mitengo yavho ndi ine ya tou kokovha fhasi hu tshi vhambedza na mavhengele kana zwimauswu zwa vhathu vha fhano hayani.

Vho Tshifhiwa Mudau, vhane vha vha mudzulapo wa kusi kwa Mahlarini, ngei Dopeni vhari vhone vha renga zwiḽiwa kha dzi ṱhunḓu ngauri vha na mitengo ya fhasi hone ndi vhane vha dzula tsini navho. “Ndi dzula tsini vhukuma na vhengele ḽa ṱhunḓu. Vha rengisa ṱhoḓea dza vhathu dza ḓuvha ḽinwe na ḽinwe u fana na vhurotho, na zwimunemune. Vhathu vhari vha rengisa zwiḽiwa zwisi zwa vhukuma. Naho zwo ralo, nne ndi ḓo bvela phanḓa na u renga kha dzi ṱhunḓu ngauri vha rengisa nga mitengo ya fhasi, hone na masheleni kha ikonomi yashu ndi ane a konḓa vhukuma,” vha amba.

Vha nyanḓadza mafhungo vha Limpopo Mirror vho amba na munwe wa dzi ṱhunḓu ane a rengisa, e a humbela u vhidzwa Alex. Alex uri vhone vha renga zwiliwa kha mavhengele mahulwane kana dzi holosele ngei Thohoyanḓou. “Zwa u rengisa zwiḽiwa zwo fhirelwaho nga tshifhinga na mafola a zwisiho mulayoni ndi mulandu washu. Ari anzeli u sedzulusa tshifhinga tsha u rengisa zwiḽiwa kana zwibveledzwa. Naho zwo ralo, vhathu vha a kona u vhona musi maṱiraka a zwinwiwa u fana na Coca-cola vha tshi zwi ḓisa mavhengeleni ashu. Naho vhathu vha tshiri ri rengisa zwiḽiwa zwi si zwavhukuma, ari koni kana arina mamaga ane ra a shumisa u ita zwashu zwiḽiwa zwisi zwa vhukuma. Nne ndo rali ndi ḽa zwiḽiwa zwine ra rengisa, zwine zwavha zwi zwa Halaal,” a amba.

Alex o engedza uri vharengisi vha Afrika Tshipembe vha tou pfa vha tshi shushudzea ngavho.

Vha muhasho wa mveledziso ya ikonomi, vhupo na vhuendi fhano Limpopo (LEDET), vho farisana zwanḓa na vha vhupholisa ha Afrika Tshipembe (SAPS), vha muhasho wa mupo, na vha mimasipala yapo, vho ḓou thoma fulo ḽa u sedzulusa arali vharengisi vha na bammbiri dzo teaho dza u rengisa, arali ṱhunḓu dzi fhano lwa mulayoni, na u sedzulusa u fhirelwa nga tshifhinga ha zwiḽiwa, ha katelwa na u sedzuluswa ha vhathu vhane vha ṋea dzi ṱhunḓu fhethu ha u rengisela.

Vhaofisiri vha LEDET, SAPS, SANCO na foramu ya vhupholisa ya tshitshavha vho dovha hafhu vha bva fulo kha vhupo ha Nzhelele, Makhado ward 33, he vha wana mafola asi mulayoni na zwiḽiwa zwo fhirelwaho nga tshifhinga. Kha fulo iḽo ḽa Limpopo, ho neiwa dzi ṱhunḓu ndaṱiso ya masheleni a paḓaho fumbili-ṱhanu wa zwigidi, hone vho farwa na u dzivhelwa u rengisa.

Date:22 November 2023

By: Maanda Bele

Maanda  Bele, born and raised in Nzhelele Siloam, studied journalism at the Tshwane University of Technology.

He is passionate about current news and international affairs.

He worked as part of the Zoutnet team as an intern in 2017.

He is currently a freelance journalist specialising in news from the Vhembe district.

Read: 205