Phosho ya radio yo swikisa kha u thuntshwa ha huvhadzwa mune wa muḓi.

Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.

Kha tshiwo tshe tsha mangadza vhadzulapo na u sia vhanzhi vhe na dzi mbudziso u fhira dzi phindulo, ndi musi munna wa pholisa we avha a khou kaidzelwa phosho ya radio o swika he a thuntsha a huvhadza mune wa fhethu hune a dzula hone. Tshiwo tsho bvelela nga Musumbuluwo ngei Makwarela, tsini na Sibasa.

Munna uyo wa pholisa ndi sedzheni a bvaho Ngwekhulu Tshilata nnḓa ha Vuwani, zwa zwino u shuma kha yunithi ya vhudziki ya vhupholisa ha tshitshavha (POPS) ire Thohoyandou.

Muambeli wa mapholisa a Limpopo Vho Brigadier Hlulani Mashaba vho khwaṱhisedza tshiwo itsho. “Uya nga muvhigo, mupondiwa vho swika vha wana muhumbulelwa o dzula nnḓa hu na phosho ya radio, vha mu kaidza ha konou vuwa khuḓano,” vha amba. Mune wa muḓi o amba uri phosho iyo i khou thithisa vhagudiswa kha u vhala vha tshi ḓi lugisela milingo yavho ya mafhelo a ṅwaha. “Zwori zwo ralo, muhumbulelwa a thoma u thuntsha mune wa muḓi a mbo shavha muḓini uyo,” vha engedza.

Mupondiwa vho gidimiselwa vhuongeloni vhe na mafuvhalo a u thuntshwa.

Mapholisa vho ḓou vhigelwa nga ha tshiwo itsho, na vha Independent Police Investigative Directorate (IPID) vho vhigelwa tshiwo itsho. “Tsedzuluso dzo swikisa mapholisa Vuwani, he mupondi a farelwa u lingedza u vhulaha nga Ḽavhuvhili  ḽa fumbili-thihi. U ḓoḓi vhonadza khothe ya madzhisiṱiraṱa wa Thohoyandou,” hu amba Vho Mashaba.

Vhunzhi ha madzangano vha khou kaidza zwiito zworaliho mivhunduni. Munwaleli wa davhi ḽa SANCO ya Makwarela, Vho Phanuel Mulaudzi, vhari vho shushwa na u mangadzwa nga zwiito zwa vhosedzheni. “Vhathu na zwiimiswa vho kaidzelwa u lidza dzi radio nga phosho ine ya thithisa vhagudiswa kha u vhala kha u lugisela milingo yavho,”vha amba.

Vha vhona uri zwe zwa bvelela ndi u humisela vhathu murahu, zwihulu ngauri zwo itwa nga mushumela tshitshavha ane a tea uvha tsumbo kha tshitshavha. “Mupondiwa vhovha vha khou ita zwo fanelaho nga u kaidza phosho, a touvha mashudu mavhi uri zwo swika kha u thuntshiwa. Musi a tshi ḓi vhonadza khothe ri ḓo lwedzana na uri a wane beili,” hu amba Vho Mulaudzi.

Date:24 November 2023

By: Elmon Tshikhudo

Elmon Tshikhudo started off as a photographer. He developed an interest in writing and started submitting articles to local as well as national publications. He became part of the Limpopo Mirror family in 2005 and was a permanent part of the news team until 2019.

Read: 354