Vha musanda wa Mphephu-Ramabulana vha khou ṱoḓa u bvisa Thovhele.

Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.

Kha dziṅwe dza dzi khuḓano dza miṱa ya musanda, ndi u bviswa ha Thovhele vha vhupo ha Dzanani khala Nzhelele.

Khuḓano iyo ya musanda wa Mphephu-Ramabulana, kha muṱangano we vha u fara nga ḽa fumi-malo Lambamai, vha muṱa wa musanda vho swikelela kha tsheo ya u bvisa Thovhele Vho Mavis Masala Mphehu kha vhuḓifhinduleli hoṱhe ha u vha muranga phanda. 

Vha nyanḓadza mafhungo ya Limpopo Mirror vho ṋeiwa ḽiṅwalo ḽe ḽa rumelwa nga muphirimia wa Limpopo Vho Stan Mathabatha ḽine ḽa khwaṱhisedza maambiwa a ḓuvha ḽa muṱangano wa muṱa wa musanda. Ḽiṅwalo iḽo ḽi sumbedzisa uri nzudzanyo dzoṱhe dza u bvisa Thovhele ndi dzine dza kha ḓi lugiswa. Zwa zwino gavhelo ḽavho ḽo imiswa na zwenezwo.

Kha dzinwe dza mbuno dzine dza tikedza u bviswa havho ndi uri vho tiiwa sa Thovhele nga Khotsimunene, zwine zwavha maitele a songo ṱanganedzwaho nga vha Masingo a Ha Mphephu-Ramabulana, izwi ndi ngauri Khosi, Thovhele na Vhakoma vha fanela u tiiwa nga Makhadzi wa musanda. Kha mulandu uyu, vhari maitele ayo a u tiiwa nga Vhomakhadzi a zwingo tevhedzwa sa izwi Makhadzi muhulwane Vho Phophi Ramabulana vha songovha vhone vhovha vheaho sa Thovhele, na ḽinwalo ḽia zwi tikedza..

Thovhele Mphephu vha khou dovha vha hweswa mulandu wa u sa tevhedza ndayo, nga ḽa fumbili-mbili Luhuhi ṅwaha uno vhovha vho vhidziwa kha muṱangano we vha hana u ḓa vha fhedza nga u rumela ḽiṅwalo musanda uri vha ḓo vhidza miraḓo ya musanda uri vha ḓe khavho musi vha na tshifhinga.

Vho dovha hafhu vha nyadza mulayo wa musanda nga u vhuisa  Vho Calvin Ramabulana kha khoro ya musanda wa Mphephu-Ramabulana sa muraḓo wa khoro, ngeno huuri vhovha vha tshi zwi ḓivha uri Vho Calvin Ramabulanu vho pandelwa khoroni.

Muthu vhe vha hana u bulwa dzina vhe vha luma vho ramafhungo nḓevhe vhori: "Zwo ḓa hani uri vhavhe Thovhele? Ndi ṅwana wa nnyi vhe vhavha vhe khosi? Hu vhonala hu na zwinzhi u fhira zwine vha khou amba, vha musanda vha fanela u bvela khagala tshoṱhe.”

Muambeli wa muṱa wa musanda wa Ramabulana, Vho Ntsieni Ramabulana, vhori nga murahu ha u sedzulusa masia oṱhe, vha musanda vho swikelela thandululo. “Zwoṱhe zwo tevhedzelwa uya nga mulayo, Thovhele Mphephu vhovha vho ṋeiwa na tshifhinga uri vha fhindule, fhedzi vhone vha bvela phanḓa na u pfukha milayo ya musanda,” vha amba.

Thovhele Mphephu vho hana u amba na vha nyanḓadza mafhungo.

Date:27 November 2023

By: Elmon Tshikhudo

Elmon Tshikhudo started off as a photographer. He developed an interest in writing and started submitting articles to local as well as national publications. He became part of the Limpopo Mirror family in 2005 and was a permanent part of the news team until 2019. He currently writes on a freelance basis, covering human rights issues, court news and entertainment.

Read: 433