Vhumatshelo havhuḓi vhu tou shumelwa.

Tshiṱori nga: Victor Mukwevho. Ṱhalutshedzo nga: Khathutshelo Raliphaswa.

Nyalunako e a dzhenelela muṱaṱisano wa vhonyalunako wa Miss Teen Afrika Tshipembe, Tshepiso Mphidi a bvaho Haradali, uri vhasidzanyana vha fanela u ṱutshela zwa uvha na vhushaka ha u funana na vhathu vhahulwane vhane vha vhidzwa “Sugar daddy” zwine zwavha zwo vhangiwa nga mutsiko wa u ṱoḓa u fana na ṱhama dzavho. Uri ndi khwine u vha vhona vho sedzana na pfunzo dzavho uri vha kone uḓi fhaṱela vhumatshelo havhuḓi. Muṱaṱisano wa Miss Teen Afrika Tshipembe u ḓo farelwa State Theatre ngei Pretoria nga ḽa fumi-rathi Nyendavhusiku ṅwaha uno.

Tshepiso ndi mugudiswa wa ṅwaha wa vhuraru gudedzini ḽa Univesithi ya Venda, hune a khou gudela uvha social worker.

Kha nyambedzano yawe na vha nyanḓadza mafhungo ya Limpopo Mirror ngei kusini kwawe kwa Haradali, o ombedzela uri nga nnḓa ha u aluswa kha vhupo havhuḓi nga vhabebi vhawe, ha imi nauri vhasidzanyana vhavhe na vhushaka ha u funana na vhathu vhahulwane hu u itela u wana dzimpho, masheleni na zwinwe zwinzhi. U tenda khauri muthu u fanela u tou shuma oḓi imisela uri a kone u bveledza vhumatshelo havhuḓi ene mune.

Atshi vhudziswa arali a tshi tama u fana na vhasidzanyana vhane vha ḓiswa tshikoloni nga mimoḓoro ya mavhaivhai, uri ene zwe a sedzana nazwo ndi pfunzo dzawe fhedzi uri a kone u swikelela miloro yawe yau gudedzini. “ Naho masheleni na mimoḓoro zwi tshi vha shumela zwino, musi vhanna avho vha tshi fhira shangoni, vhafumakadzi vhavho vha ḓo zwi dzhia murahu,” a amba.

Ndivho ya muṱaṱisano wa Miss Teen Afrika Tshipembe ndi u maanḓafhadza vhasidzanyana na u ṱuṱula vhuḓifulufheli havho uri vha kone u di bveledza zwavhuḓi. Vha tenda uri musidzanyana are na vhuḓifhinduleli u na maanḓa a u ḓisa tshanduko dza ndeme, kha muvhundu une a dzula khawo, u swika kha tshitshavha u mona na shango.Vha fanela uvha vhone vhane misi yoṱhe vha sa ṱuṱuwedzwi nga matshilo a vhanwe vhathu nga nḓila dzisi dzavhuḓi.

Tshepiso uri una fulufhelo uri u ḓo shuma zwavhuḓi kha muṱaṱisano uyu. “Nga nnḓa ha u imelela Limpopo, ndi khou dovha hafhu nda imelela lushaka lwa Vhavenḓa uri ri ḓivhee u mona na shango,” a engedza.

Date:27 November 2023

By: Victor Mukwevho

Victor Mukwevho Ne-vumbani joined the Mirror during it's inception in 1990. He joined the SABC newsroom in 1995, and was known by  listeners as "A u fhedzisela ari". He was a news editor for The Tembisan Newspaper from 2007 to 2015. He rejoined the Limpopo Mirror newspaper in June 2022 as a freelance journalist.

Read: 270