Nyandadzo ya mafhungo asi one yo vuwa matsivha kha muṱa wa ha Mavhunga.

Tshiṱori nga: Maanda Bele. Ṱhalutshedzo nga: Khathutshelo Raliphaswa.

U phaḓaladzwa ha mafhungo asi one kha zwileludzi zwa vhudavhidzani, azwi siki nḓaḓo fhedzi kha vhathu, zwi dovha hafhu zwa vhaisa vha kwameaho nga mafhungo ayo asi one. U phaḓaladzwa ha mafhungo asi one zwi kwamaho musidzanyana we a ḓo tambudza munwe mugudiswa ngae ngei tshikoloni tsha Mbilwi minwaha mivhili yo fhiraho, o fhedza oḓi haṱula vhutshilo.

Tshiwo itsho tsha u tambudzwa ndi he ha tambudzwa Lufuno Mavhunga we a fhedza oḓi haṱula vhutshilo nga murahu ha u tambudzwa. Hovha ho phaḓaladzwa na vidio ya musi a khou tambudzwa ye ya vhonwa nga nnyi na nnyi.

Vhege yo fhiraho ho ḓou anḓadzwa mafhungo kha Facebook ya siaṱari ḽa “Game News-Online”. Siaṱari iḽo ḽi vhonala ḽi ḽine ḽa anḓadza nga ha dzi khunguwedzo na nḓivhiso, fhedzi kha nyanḓadzo iyo hu vhonala ho anḓadzwa mafhungo a songo khwaṱhisedzwaho.

Nyanḓadzo iyo yovha yori “Mugudiswa wa Mbiulwi we a tambudza Lufuno Mavhunga oḓi haṱula vhutshilo namusi nga matsheloni. Zwi sumbedza ovha a khou tambudzwa nga u vhona Lufuno kha mabono awe”. Izwo zwo ita uri vhaṅwe vha nyanḓadza mafhungo vha khwaṱhisedze nga hazwo. Zwo ḓou wanala uri hovha ho tou sikiwa mafhungo.

Musi tshiwo itsho tshi tshi bvelela nga ṅwaha wa gidimbili fumbili-thihi, musidzanyana uyo ovha a tshe wa fhasi ha minwaha ya fumi-malo, hone madzina awe asi ambiwe kha tshitshavha na vha nyanḓadza mafhungo. O livhanyiswa na mulandu wa u ṱhasela, fhedzi mulandu wo ḓou phumulwa. Fhedzi na zwino u khaḓi livhanyiswa na mulandu wa u ṱhasela. Muambeli wa vhutshutshisi ha lushaka fhano Limpopo Vho Mashudu Malabi-Dzhangi, vho khwaṱhisedza uri nyanḓadzo ya lufu ndi mafhungo asi one.

Khotsi a Lufuno, Vho Joseph Mavhunga, vhori sa muṱa vha tshi vhona nga ha mafhungo ayo asi one vha vhaisala. Izwi ndi ngauri sa muṱa vha khou lingedza u hangwa nga masinḓambilu e a bvelela muṱani wavho. “Ri khou lingedza u hangwa nga ha zwe zwa bvelela, na namusi zwi khadi ri vhaisa sa muṱa. U vhona nyanḓadzo ya mafhungo ayo asi one zwo tou vusa matsivha muṱani. Ri humbela uri vhathu vha tendele nwana washu a eḓele nga mulalo,” vha amba.

Vhanwe vha vhathu vhe vha amba vhupfiwa havho vhari vha muṱa wa ha Mavhunga vha ngavha vho ḓi lifhedzela nga u shumisa nḓila dza mishonga ya tshirema. “Rine ri vhatendi vho tshidziwaho, ri tenda khauri zwithu zwi bvelela nga tshifhinga tshazwo. Ari tameli muthu lufu. Mazwifhi na u pomokiwa zwi touri humbudza tshiwo tsha musi ṅwana washu a tshi ḓi haṱula vhutshilo,” vha engedza.

Date:27 November 2023

By: Maanda Bele

Maanda  Bele, born and raised in Nzhelele Siloam, studied journalism at the Tshwane University of Technology.

He is passionate about current news and international affairs.

He worked as part of the Zoutnet team as an intern in 2017.

He is currently a freelance journalist specialising in news from the Vhembe district.

Read: 333