ADVERTISEMENT:

 
 

Rendani Chauke we a thuntshwa a vhulawa ngei Dopeni, Nzhelele hayani hawe nga ḽa fumi-sumbe Ḽara. Tshifanyiso tsho bveledzwa.

Muṱhannga o thuntshwa a vhulawa hayani ngei Dopeni.

 

Tshiṱori nga: Maanda Bele. Ṱhalutshedzo nga: Khathutshelo Raliphaswa.

Vha muṱa wa ha Chauke ngei Dopeni, Nzhelele vha tshe vho akhamadzwa na uḓi vhudzisa mbudziso nnzhi dzisina phindulo nga murahu ha u thuntshwa ha vhulawa muraḓo wa muṱa wavho nga Ḽavhuṱanu, ḽa fumi-sumbe Ḽara.

Uya nga muambeli wa muṱa, Vho Eddie Mukoma, vhari muraḓo uyo we a vhulawa, Rendani Chauke, wa minwaha ya fumbili-thihi ovha o dzula nnḓa na ḽilwelavanḓa ḽawe na munwe wa shaka, musi hu tshi bvelela muhumbulelwa afho muḓini, o vhea tshigidi khunduni tshi khagala.

“Ho thoma u swika vhaṱhannga vhavhili vhane ravha ḓivha vha vha vho ima tsini na luvhondo. Nga murahu ha swika muhumbulelwa ane hu vhonala ovha e na avho vhaṱhannga avho vhavhili a thoma u vhudzisa mbudziso dzi sa pfesesei. Nga u vhona vhathu vha khou ṅwa mahalwa avho, avho vhudzisa uri naa afha ndi tshipotoni naa. O ḓou thoma u sema vhathu, a konou thoma u thuntsha asa londi, ndi he vha muṱa vha thoma u shavhela nḓuni. Nga murahu ha u fhumula ha u thuntsha, vhori vha tshi bvela nnḓa vha wana Rendani o eḓela fhasi o lovha.”

Vho Mukoma vhari vha muṱa vha tshe vho shushea hone vha khou balelwa u ṱanganedza nyimelo. “Ovha a tshe muṱuku. Mme awe vha khou pfa vhuṱungu, sa muṱa ro kwashea. Rendani ovha e nwana a shumaho oḓi imisela o ḓalaho lufuno. Ri adi vhudzisa uri ndi ngani muthu o tou ḓa muḓini washu a thoma u thuntsha a songo khakhelwa nga muthu. Ro tshinya mini uri ri ṱhaselwe ngaurali? Ndia kholwa mapholisa vha ḓo kona u fara muponi uyo sa izwi a tshi ḓivhea,” vha amba.

Muambeli wa mapholisa a Vhembe W/O Vho Vuledzani Dathi vhari mapholisa vhovha vho fara vhahumbulelwa vhavhili vhe vha vha vha khou ṱumanywa na tshiwo itsho, fhedzi vho fhedza vho vhofhololwa. “Mulandu a ungo vheiwa kha mutevhe wa khothe. Muhuwelelwa ua ḓivhea, hone zworalo na mapholisa vha khou bvela phanḓa na tsedzuluso na u zwimana nae, ri tenda uri u ḓo farwa,“ vha amba.

Muṅwaleli wa davhi ḽa SANCO ya Dopeni, Vho Richard Mukhaninga vhari vhadzulapo navho vho shushwa nga tshiwo itsho tshe tsha bvelela. “U vhona vhaswa vha tshi vhulahana zwi ḓisa vhuṱungu tshitshavhani. Sa vhadzulapo ri khou lingedza nga nḓila dzoṱhe u lwa na vhugevhenga kha vhupo hashu, fhedzi u lingedza hashu ahu vhuyedzi malamba,” vha amba..

Mapholisa vha khou zwimana na vhapondi, hone ane anga thusa kha mulandu uyu, anga swikisa muvhigo kana zwidodombedza kha tshiṱitshi tsha tsini nae kana vha founela muofisiri wa tsedzuluso Vho Sgt Collen Sinyosi kha 082 0580064.

 

Date:30 November 2023

By: Maanda Bele

Maanda  Bele, born and raised in Nzhelele Siloam, studied journalism at the Tshwane University of Technology.

He is passionate about current news and international affairs.

He worked as part of the Zoutnet team as an intern in 2017.

He is currently a freelance journalist specialising in news from the Vhembe district.

Read: 316

 

ADVERTISEMENT

 

ADVERTISEMENT:

ADVERTISEMENT:

 

Recent Articles

ADVERTISEMENT

 

Popular Articles