Nḓowetshumo ya radio yo xetshelwa muhashi

Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.

U ri sia shangoni ha Vho Lt-Col Samuel Londani Khwashaba, vha kusi kwa Maungani, nnḓa nyana ha Ṱhohoyandou zwo vhaisa vhunzhi ha vhathu vho xetshelwa, zwihulu vhadzulapo vha vhupo ha Vhembe. Vho Khwashaba vhovha vhe muofisiri wa mapholisa a ḓivheaho na muhashi kha radio. Vho lovha vhuongeloni ha MediClinic nga Lavhuna, ḽa fumbili-thanu Phando, nga murahu ha u lwa na vhulwadze lwa tshifhinga tshiṱuku.

Vho Khwashaba vhaminwaha ya futhanu ina vhovha vha tshi shuma kha sia ḽa thekiniki kha Maphisa a Vhembe na muhashi kha Univen FM, Phalaphala FM, na Vhembe FM zwino, he vha hasha mbekanyamushumo ya rege na jazz. Vhovha vha tshi thusa na kha dzi khaedu dza thekiniki kha zwiṱitshi zwa dzi radio.

Vhovha vhe ramuzika wa muzika wa gosipele, he vhavha vha tshi ḓivhea nga ḽa “A Dread Mon” kha nḓowetshumo ya muzika. Vha ḓo elelwa sa ramuzika vhe vha alusa mabuḓo a vhoramuzika vhanzhi, hu tshi katelwa Rofhiwa Manyaga, Naledzani Netshirembe, Hanedzani Mutele, na vhanzwe vhanzhi, vhe vha vha vha tshi vha nea phera ya u kandisa mizika yavho hayani havho.

Muṅwe wa vhathu vhe vha thoma u rumela milaedza ya ndiliso kha vha muṱa ndi mudzulatshidulo vha bodo ya Vhembe FM, Vho Matodzi Mphephu, vhe vha ṱalusa Vho Khwashaba sa munna we avha a tshi kona u tshila zwavhuḓi na muṅwe na muṅwe. “Vho sia tshikhala tshine tsha pfala uri atshina muthu kha tshiṱitshi tshashu. Vho Khwashaba vhovha vhe muthu ane a tou amba zwithu zwo tou ralo, vha tshi ima na zwine vha tenda khazwo,” vha amba.

Khaladzi avho, Vho Mpho Khwashaba, vhari lufu lwa khaladzi avho lwo sia vha muṱa vho vhaisala vhukuma. “Ro xetshelwa nga vhabebi ri tshi vhaṱuku, ndi he khaladzi anga vha ri ṱhogomela sa mubebi. Vhovha vhe na mbilu ya vhuthu, vhanzhi vha nga zwi ṱanziela. Vhovha vhe zwoṱhe kha rine,” vha amba.

Vho Khwashaba vho bebwa Ngovhela Phindula nga ṅwaha wa 1970. Vha dzhena zwikolo zwa u fhambana vha sa athu u ṱhaphudza pfunzo dzavho dza maṱiriki kha tshikolo tsha nṱha tsha Shayandima. Mushumo wavho wau thoma vho shuma Telkom nga ṅwaha wa 1988, he vha shuma sa rathekiniki. Vho ḓou shuma kha SAPS nga ṅwaha wa 2005, he vha shuma u swika zwino vha tshi ri sia vha khou shuma hone.

Date:02 February 2024

By: Elmon Tshikhudo

Elmon Tshikhudo started off as a photographer. He developed an interest in writing and started submitting articles to local as well as national publications. He became part of the Limpopo Mirror family in 2005 and was a permanent part of the news team until 2019.

Read: 184