Muṱhannga o farelwa u vhulaha mufunwa wawe Hachavani.

Tshiṱori nga: Maanda Bele na Thembi Siaga. Ṱhalutshedzo nga: Khathutshelo Raliphaswa.

Muṱhannga wa minwaha ya fumbili-ina a bvaho Hachavani o ḓi vhonadza khothe ya madzhisiṱiraṱa wa Waterval nga Musumbuluwo, wa ḽa ṱhanu Luhuhi. O ḓi vhonadza malugana na mulandu wau vhulaha mufunwa wawe a bvaho Habokisi wa minwaha ya fumi-ṱahe, Rivoningo Angel Ngoveni.

Uya nga muambeli wa mapholisa a Limpopo Vho Lt-Col Malesela Ledwaba, Rivoningo o bva hayani nga Mugivhela,  wa ḽa fumbili-sumbe Phando a tshiya u ḓi ṅwalisa gudedzini ḽa Yunivesithi ya Venda. Vha muṱa vhari ovha oḓi mba uri u ḓoya u dalela mufuṅwa wawe Hachavani, hune asi kule na hayani, uri a ḓou mu laela. Vha muṱa vho ḓou vhona uri ha khou vhonala vhaya u vula mulandu wa muthu o ngalangala ha muthu mapholisani.

Tsedzuluso dza mapholisa dzo vha swikisa kha u fara muṱhannga uyo, Nhlamulo Maluleke, nga Lavhuna, ḽa u thoma Luhuhi, nga matsheloni. O ḓou hweswa mulandu wau vhulaha nga murahu hau vha isa kha mulonga we a vhulunga tshitumbu tsha Rivoningo. Tsedzuluso thangeli dzo sumbedza uri Nhlamulo o rwa Rivoningo nga tshidina kha ṱhoho, nga murahu a mu ṱhavha kha zwipida zwa nṱha zwa muvhili nga tshihali.

Nga ḓuvha ḽa uḓi vhonadza hawe khothe lwa u thoma, tshigwada tsha vhathu tshovha tsho kuvhangana nnḓa ha khothe, vha tshi lwela uri huvhe na vhulamukanyi kha Rivoningo.

Zwe zwa ambiwa khothe ndi uri Nhlamulo o ḓou fhisa phera yawe yau eḓela hayani nga murahu ha u vhulaha Rivoningo. Thanzi kha mulandu uyu vhari musi muṱa wa ha Ngoveni vho thoma u ṱoḓa Rivoningo, Nhlamulo o ḓou founela khotsi a Rivoningo atshi vha vhudza uri vho dzhiiwa nga khani vhe Bulugwane. "Makhulu a Nhlamulo vho kulumaga phera ya Nhlamulo he a humbulelwa uri o vhulaela Rivoningo a sa athu u i fhisa, zwine zwa vhilaedzisa," ha amba Thanzi.

Nhlamulo o hana beiḽi, hone mulandu wawe wo fhiriselwa kha ḽa fumi-mbili Lambamai uri vha bvele phanda na thodisiso.

Muimeleli wa muṱa, Vho Khazamula Ngoeni, vhari vha khou balelwa u ṱanganedza zwe zwa bvelela kha ṅwana wavho. “Rovha ri khou lavhelela zwivhuya zwinzhi khae musi a tshi bvela phanḓa na ngudo dzawe. Mme awe vho lovha atshe muṱuku ra sala ri tshi mu ṱhogomela, hone ovha e na ndoro dzavhuḓi,” vha amba.

Vho Masungulo Mukhari, vhane vhavha vhakoma vha muvhundu, vho ṱahisa u akhamala nga zwe zwa bvelela kha Rivoningo sa zwiito zwi si na vhuthu khazwo. “Ri humbulela uri a ngavha ovha e fhasi ha ndango ya zwikambi na zwidzidzivhadzi. Ri tama uri vhaswa vha ḓi dzhenise kha zwiito zwine zwa vhuyedza u fana na mitambo, uri vha kone u ṱutshela zwiito zwi fanaho na mabulayo na vhugevhenga,” vha amba.

Date:12 February 2024

By: Maanda Bele

Maanda  Bele, born and raised in Nzhelele Siloam, studied journalism at the Tshwane University of Technology.

He is passionate about current news and international affairs.

He worked as part of the Zoutnet team as an intern in 2017.

He is currently a freelance journalist specialising in news from the Vhembe district.

Read: 215