Muḓivhalea wa phurofesa Vho Mulalo Doyoyo vho fhira fhano shangoni.

Tshiṱori nga: Victor Mukwevho. Ṱhalutshedzo nga: Khathutshelo Raliphaswa.

Muṅwe wa vhathu vho funzeaho fhano kha ḽashu ḽa Afrika Tshipembe, Vho Mulalo Reuben Doyoyo vho fhira shangoni vhenḓuni yavho ngei Kyalami Estates, Johannesburg, vhege yo fhiraho.

Mukomana wavho, Vho Tshitokisi Bitches Doyoyo, vhori mathomoni a vhege ino vho ṱanganedza mafhungo au fhira fhano shangoni ha murathu wavho zwe zwa sia vha muṱa vho kwashea dzi mbilu zwihulu ngauri zwovha zwi songo lavhelelwa. Vhari muṅwe mukomana wavho, Vho Albert Doyoyo, vhari vho lingedza u founela Vho Mulalo kha ṱhingo yavho nga Lavhuraru ḽa vhege yo fhiraho, fhedzi vha si kone uvha wana kha ṱhingo. Vho ḓou thoma u vhilaela he vha kwama miṅwe miraḓo ya muṱa uri vha lingedze u vha wana na uya uvha ṱola muḓini wavho.

“Nga murahu hau balelwa roṱhe u vha wana kha ṱhingo, Vho Albert vho ḓou ya muḓini wavho u vha ṱola vhe na khaladzi ashu, Vho Tshifanyiso Doyoyo, ndi he vha wana mafhungo auri Vho Mulalo vho no fhira fhano shangoni,” vha amba.

Vho Doyoyo vho bebwa vha aluswa kusini kwa Vondwe he vha thoma pfunzo dzavho kha tshikolo tsha fhasi tshiṱuku tsha Vondwe nga ṅwaha wa 1977 vha ḓou fhirela kha tshikolo tsha fhasi tshihulwane tsha Tshidimmbini nga ṅwaha wa 1981. Vho ḓou thoma pfunzo dza tshikolo tsha nṱha kha tshikolo tsha nṱha tsha Tshidimbini nga ṅwaha wa 1984. Nga ṅwaha wa 1986 vho ḓou ya tshikoloni tsha nṱha tsha Mbilwi he vha ṱhaphudza maṱiriki yavho nga ṅwaha wa 1988.

Vhori zwezwo vha kha pfunzo dzavho dza nṱha gudedzini la Yunivesithi ya Western Cape, vhavha muofisiri wa nyambedzano wa khoro ya matshudeni vha Engineering, muimeleli wa tshiimiswa tsha vhainzhinia vha zwa u fhufha muyani vha Afrika Tshipembe, na mutumbuli wa sosaithi ya matshudeni a matshudeni ayo.

Vho ṱhaphudza pfunzo dzavho dza masiṱasi kha solid mechanics na applied mathematics nga ṅwaha wa 1995 na 1996 ngau tevhekana. Nga ṅwaha wa 1999, vho dou ṱanganedza vhuimo ha tsedzuluso dza vhudokotela ubva kha vhatshiimiswa tsha thekinoḽodzhi u khwinifhadza pfunzo dzavho kha applied mechanics.

Vha ḓo vhulungwa zwirabani zwa Vondwe nga Sondaha ya ḽa fumi-sumbe Thafamuhwe. Tshumelo ya mbulungo iḓo farewa hayani havho, u bva nga awara ya vhurathi nga matsheloni.

Date:15 March 2024

By: Victor Mukwevho

Victor Mukwevho Ne-vumbani joined the Mirror during it's inception in 1990. He joined the SABC newsroom in 1995, and was known by  listeners as "A u fhedzisela ari". He was a news editor for The Tembisan Newspaper from 2007 to 2015. He rejoined the Limpopo Mirror newspaper in June 2022 as a freelance journalist.

Read: 311