Makhadzi Vho Phophi Nnwendamutswu Tshitangoni vho lovha vhe na minwaha ya 104

Tshiṱori nga: Maanda Bele. Ṱhalutshedzo nga: Khathutshelo Raliphaswa.

Makhadzi Vho Phophi Masiavhula Gumbo Nwendamutswu, mudzulapo vhe vhavha vha tshi ṱhonifhiwa zwihulu kha kusi kwa Tshithuthuni, Nzhelele, vho lovha nga ḽa fumi-na-malo Ṱhafamuhwe vhe na minwaha ya ḓana-na-iṋa. Vho vhulungwa  nga Lavhuṱanu ḽa fumbili-mbili Ṱhafamuhwe ngei Tshiendeulu tsha Nwendamutswu kusini kwa Tshixwadza.

Vho Thinawanga Malise, mudzulatshidulo wa dzangano lavhadzulapo la SANCO Tshithuthuni, vhari Vho Makhadzi Vho Phophi vhovha vhone mualuwa a fhiraho vhaaluwa vhoṱhe vha Tshithuthuni, hone hu na khonadzeo uri u fhira na vhaaluwa vha Nzhelele ngau angaredza. Vho  bebwa nga ḽa fumi-na-mbili Fulwi 1920 kusini kwa Tshixwadza muṱani wa musanda wa Nwendamutswu. Vhovha vhe tanzhe ḽa munnaavhane Khosi Vho Nthangeni Nwendamutswu na mufumakadzi wavho, musadziavhane Vho Muthelo Nwendamutswu. Vhovhe vhe na murathu na khaladzi, Sophia na Thongwa Nwendamutswu.

Makhadzi Vho Phophi vhovha vho malwa nga munnaavhane Vho Frans Tshitangoni vha kusi kwa Fefe, vhe vha vha na vhana vhaṋa: Samuel, Merinah, Violet, na Siman (Mbulaheni). Nga ṅwaha wa gidiḓaṱahe fusumbe-malo, vho ḓou pfulutshela Tshithuthuni, he vha dzula hone u swika maḓuvha avho au fhedzisela Shangoni. Vho sia ṅwana wavho wa phedzi, vhaḓulu vha fumi-na-thihi, na vhaḓuluḓulu vha fumbili-na-sumbe.

Zwi tshi tevhela u dzama ha khotsi avho, khaladzi avho Vho Thongwa vho ḓou ḓadza mativha. Fhedzi ngauri zwovha zwi songo fanela sa izwi Vho Thongwa vhovha vhe si tanzhe, ho ḓou ḓadzwa mativha nga Makhadzi Vho Phophi, naho mvelele yovha i tshi tendela vhathu vha tshinnani fhedzi. Vho ḓou fhirisela vhuhosi kha ṅwana wavho wa tanzhe, Vho Samuel Nwendamutwsu, vhone vhadzheniswa sa Makhadzi.

Nga ṅwaha wa 2022 nga ḽa rathi Khubvumedzi, vho ḓou lozwa miraḓo ya ṱahe vhe vha lovha kha khombo ya moḓoro tsini nyana na Bulugwane. Izwo zwo bvelela ho sala maḓuvha maṋa uri hu ḓadzwa mativha nga murahu hau dzama ha munnaavhane Vhamusanda Vho Samuel Nwendamutswu.

Vho Thinawanga Malise vho ṱahisa ḽauri Vho Phophi vhovha vhe mudzulapo a shelaho mulenzhe zwihulu khau alusa muvhundu wavho. Vhovha vha tshi kovhelana nḓivho na vhaṱuku na vhahulwane. Vhari vhovha vhe muthu vho ḓi imiselaho u kovha vhukoni na nḓivho nga kha zwithu zwau fhambana u fana na mutshino wa domba, vha tshi maanḓafhadza nau ṱuṱuwedza vhasidzanyana nga ha sialala na mvelele.

Date:02 April 2024

By: Maanda Bele

Maanda  Bele, born and raised in Nzhelele Siloam, studied journalism at the Tshwane University of Technology.

He is passionate about current news and international affairs.

He worked as part of the Zoutnet team as an intern in 2017.

He is currently a freelance journalist specialising in news from the Vhembe district.

Read: 244