Munwe radzithekhisi vho thuntshiwa vha vhulawa Madombidzha.

Tshiṱori nga: Kaizer Nengovhela. Ṱhalutshedzo nga: Khathutshelo Raliphaswa.

Rathekhisi vha ḓivheaho kha kusi kwa Hamagau, Vho Jeffery Matshivha, vho thuntshiwa vha vhulawa tsini na tshipoto nga ḽa fumbili-malo Thafamuhwe. Vho Matshivha vhovha vhe na minwaha ya fuṱhanu vha tshi vhulawa. Bulayo ḽavho ndi ḽine ḽa khou ṱumanywa na khuḓano dza vhoradzithekhisi.

Iḽi ndi bulayo ḽa vhuvhili ḽa vhoradzithekhisi ḽe ḽa bvelela nga tshifhinga tsha vhege mbili fhedzi. Nga ḽa fumbili-mbili Thafamuhwe, ho vhulawa radzithekhisi wa minwaha ya furaru-raru Muvhuso Justice Mbaimbai, muḓini wawe.

Bulayo ḽa Vho Matshivha lo sia vhadzulapo, vhoradzithekhisi na vhalangi vha vhuendi vho akhamala, zwe vhunzhi havho vhari muvhuso u fanela u dzhia maga o khwaṱhaho khau lugisa dzi khuḓano idzi nau fara vhaiti vha mabulayo aya. Khuḓano kha mabindu a dzi thekhisi na mabulayo ane avha khou ṱumanywa na mabindu aya ndi zwiito zwine zwo novha nḓowelo na kha vhupo ha mahayani sa kha vhupo ha dzi ḓoroboni khulwane. Zwiito izwi kha tshiṱiriki tsha Vhembe zwi khou anda.

Muambeli wa mapholisa kha tshiṱiriki tsha Vhembe, Vho sgt Vuledzani Dathi, vhari Vho Matshivha vho thuntshiwa nga madekwana nga awara ya vhumalo. “Vho thuntshiwa nga muthu we avha e tsini navho, ro wana dzi gulu tsini na tshitumbu tshavho,” vha amba. Vho Dathi vhari Vho Matshivha vhovha vho ima nnḓa ha tshipoto musi hu tshi swika munna oḓi ṱamaho nga tshigidi. Munna uyo o ḓou vha thuntsha a songo amba tshithu. Nga murahu ha u thuntsha Vho Matshivha vha sia afho fhasi, o ḓou shavha na zwenezwo. “Zwa zwino a ri ḓivhi muiti wazwo kana tshivhangi tsha bulayo, fhedzi khuḓano dza vhukati ha vhoradzithekhisi ndi tshivhangi tshine atshi khou thudzelwa kule zwa zwino,” vha amba.

Mudzulatshidulo wadzangano lavhorathekisi dza Polokwane/Sibasa, Vho Lutendo Machochi, vhari vhoshushwa vha tshi pfa nga ha u thuntshiwa ha muṅwe muraḓo wa tshiimiswa tshavho. “Vharivhoshumisani na mufu, vhane vho shushea nga ha u lovha ha Vho Matshivha vha khou wana thuso ya zwa muhumbulo na mutakalo,” Vho Machochi vha engedza. Vho isa maipfi a ndiliso kha vha muṱa wa ha Matshivha. “Vho shela mulenzhe kha u alusa vhukonani vhukati ha vhathu, vha shuma vho ḓi imisela, na uḓi kumedzela kha zwoṱhe zwe vha vha vha tshi ita kha muṱa wavho na tshitshavha. Zwiito zwavho zwoṱhe ri ḓo dzulela u zwi elelwa,” Vho Machochi vha amba.

Muambeli wa muṱa, Vho Vusi Mathabatha, vhari sa muṱa vha tshe vho vhaisala hone a vha pfesesi uri ndi ngani Vho Matshivha vho vhulawa nga nḓila ya tshiṱuhu ngaurali. “Ro shushea nau vhaisala nga tshiwo itshi. Vhovha vhe thikho kha rine roṱhe,” vha amba.

Vho ṱalusa Vho Matshivha sa munna vhe vha vha vhe na mbonela phanḓa na uvha na maano kha zwine vha ita. “Ro ṱanganedza milaedza na ṱhingo dza ndiliso ubva kha vhathu vha tsini na kule zwine zwa sumbedza uri malume anga vhovha vhe munna a tshilaho na vhaṅwe vhathu zwavhuḓi tshifhinga tshoṱhe. Vhovha vha sa khethi muthu nga muvhalo, vhubvo kana vhurereli hawe,” vha engedza vha tshi vhina.

Hu tshi ṅwaliwa tshiṱori itshi hovha hu sa athu u ḓivhadziwa nga ha ndugiselo dza mushumo wa tshihumbudzo na mbulungo.

Date:05 April 2024

By: Kaizer Nengovhela

Kaizer Nengovhela started writing stories for Limpopo Mirror in 2000. Prior to that he had a five year stint at Phala-Phala FM as sports presenter. In 2005 Kaizer received an award from the province's premier as Best Sports Presenter. The same year he was also nominated as Best Sports Reporter by the Makhado Municipality. Kaizer was awarded the Mathatha Tsedu award in 2014.

Read: 228