‘Mukoma vho tshinyadza ndaka yanga’

Tshiṱori nga: Kaizer Nengovhela. Ṱhalutshedzo nga: Khathutshelo Raliphaswa.   

Mudzulapo, Vho Russell Ratombo vha bvaho kha kusi kwa Komati tsini nyana Vleifontein vho tshuswa nga murahu hau kwashekwanya ha nnḓu yavho, zwi tshi tevhela khuḓano nga ha vhune ha mavu e nnḓu iyo ya fhaṱiwa hone. Nnḓu iyo yo kwashiwa hu songo tevhelwa maga oṱhe au tendelwa u thutha nnḓu iyo ubva kha Vhamusanda vha muvhundu uyo.

Vho Ratombo vhari vhovha vho tou lavhelesa vho bilufhala musi nnḓu yavho itshi thuthiwa nga Lavhuraru ḽa vhege yo fhiraho ya ḽa fumi Lambamai. Vho vhudza vha nyanḓadza mafhungo ya Limpopo Mirror uri vho renga mavu ubva kha mufumakadzi vhane vha dzula Nzhelele nga ṅwaha wa gidimbili-fumbe vhe vha vha badela masheleni a swikaho zwigidi zwa sumbe.

Musi vha tshi humbelwa uri vha bveledze ṱhanziela ya thendelo ya tshidzulapo kha mavu ayo (PTO), Vho Ratombo vho kundelwa u ḓisa ṱhanziela iyo. Vhari vho lingedza lwa tshivhalo u kwamana na mufumakdzi vhe vha rengisela mavu khavho fhedzi vho kundelwa u vha wana. “Ndo thoma u fhaṱa nnḓu nga phera nthihi ndi tshi fhaṱela muṱa wanga, fhedzi zwa zwino ro lozwa nnḓu yashu,” vha amba.

“Nnḓu yanga yovha i zwoṱhe kha nne. Ndo vhulunga masheleni lwa minwaha minzhi uri ndi kone u fhaṱa nnḓu yanga, hafhedza muṅwe muthu a ḓa u i thutha nga mithethe isi gathi. Zwa zwino ndi khou balelwa u ḓivha uri ndi ite mini sa izwi zwithu zwe nda salelwa nazwo hu zwiambaro zwe nda ambara zwa zwino. Zwine nda khou ṱoḓa zwa zwino ndi u wana nnḓu yanga fhedzi. Musi vha tshi ḓa, a vhango amba na nṋe – vho tou swika na u thutha nnḓu yanga. Ndo lozwa zwithu zwoṱhe zwe zwavha zwi nga ngomu nḓuni hu tshi katelwa thelevishini, tshixwatusi, zwiḽiwa, na ndaka yoṱhe,” vha amba.

Vho Ratombo vho ṱahisa uri zwe vhakoma vha ita zwovha sia vho bilufhala nau nyama sa izwi vha songo thoma vha amba navho musi vha sa athu u thutha nnḓu yavho. “Ahuna nḓivhiso ye ya ḓisiwa kha nne. Ndi nnyi ane a nga fhaṱa kha mavu ane azwi ḓivha uri azwiho mulayoni uri a fhaṱe khao?” vha engedza.

Vha tshi fhindula, vhakoma Vho Patrick Sambo vho ṱahisa zwauri ndi vhone vhane vhavha na vhuḓifhinduleli ha u tsheela vhathu mavu na uvha ṋea ṱhanziela dza ndango ya mavu. Musi vha tshi vhona nnḓu iyo, vho humbela Vho Ratombo uri vha vha ḓisele vhuṱanzi ha ndango kana vhune ha mavu ayo. Vho Sambo vhari Vho Ratombo vho kundelwa u vha ṋea zwidodombedzwa zwa mufumakadzi we vha renga mavu ayo khavho. “Kha tsedzuluso dze ra ita, ro wanulusa zwauri mavu ayo hango ṅwaliswa lwa mulayo, sa izwi nomboro dzoṱhe dza miḓi dzi tshi tea ṅwaliswa kha vhakoma na vha masipala wa Makhado,” vha amba.

Vho Sambo vho hanedza uri ndi vhone vhe vha bvisa ndaela yauri nnḓu ya Vho Ratombo i thuthiwe, vhari izwi ndi u sinyuwa ha vhadzulapo vhe vha vha vho sinyuwa nga u anda ha vhugevhenga kha muvhundu wavho.

Muambeli wa mapholisa a Vhembe, Sgt Vuledzani Dathi, vho khwaṱhisedza tshiwo he vha amba zwauri ho vulwa mulandu wau tshinyadza ndaka. Ahuna muthu ane ono fariwa zwa zwino, ṱhoḓisiso dza mapholisa dzi khou bvela phanḓa.

Date:19 April 2024

By: Kaizer Nengovhela

Kaizer Nengovhela started writing stories for Limpopo Mirror in 2000. Prior to that he had a five year stint at Phala-Phala FM as sports presenter. In 2005 Kaizer received an award from the province's premier as Best Sports Presenter. The same year he was also nominated as Best Sports Reporter by the Makhado Municipality. Kaizer was awarded the Mathatha Tsedu award in 2014.

Read: 232