Vhadzulapo vha Nzhelele vho rwa mavemu vha lovha

Tshiṱori nga: Kaizer Nengovhela. Ṱhalutshedzo nga: Khathutshelo Raliphaswa.

Kha zwinwe zwa zwiwo vhuponi ha Vhembe hune tshitshavha vha dzhia mulayo vha vhea zwanḓani zwavho, ngei Nzhelele, Tshituni Tsha Nṱha vhadzulapo vho rwa mavemu vhavhili vha lovha. Mavemu avho vhavha vha khou pomokwa u tambudza vhadzulapo nga vhugevhenga kha mivhundu ya Biaba, Tshituni, Mawoni na minwe ya tsini.

Vhadzulapo vhovha vha khou pomoka mavemu mavhili na muthusi wavho muthihi. Nga ḽa fumbili-na-rathi Ḽara, munwe wa vhadzulapo vha Tshituni tsha Nṱha o ṱangulwa ṱhingokhwala na masheleni nga vhanna vhararu, ndi he a huwelela kha vhadzulapo a tshi ṱoḓa thuso. Vhadzulapo vho ḓou bva nga vhunzhi, vhanna avho vha tshi lingedza u shavha ho ḓou farwa vhavhili uyo munwe a kona u shavha. Nga u sinyuwa ha vhadzulapo vho thoma u vha rwa nga zwihali zwa u fhambana, munwe wavho a tou fhiswa u swika a tshi lovha, uyo u ḓivhea a dzina ḽa Corswell Matumba (31) a bvaho Haramantsha. Munwe ane a ḓivhea nga ḽa Dzudzanyani ‘America’ Phathela (33) wa Tshituni, o phuluswa nga mapholisa fhedzi nga mafuvhalo a u rwiwa o ḓou lovhela vhuongeloni.

Muambeli wa mapholisa a Limpopo, Brig Vho Hlulani Mabasa vhari mapholisa vha khou zwimana na vhahumbulelwa kha bulayo ḽa mavemu ayo.

Mukhonishinara wa mapholisa vunḓuni ḽa Limpopo Lt-Gen Thembi Hadebe vho kaidza vhukuma zwiito zwa vhadzulapo vhane vha dzhia mulayo vha vhea zwanḓani zwavho nga uvha vhulaha. “Ri dzulela u eletshedza vhadzulapo uri vha ṱutshele zwiito zwa u dzhia mulayo vha vhea zwanḓani zwavho, vhatea uisa mbilaelo dzavho mapholisani, kana kha zwiimiswa zwine zwa tandulula vhugevhenga mivhunduni yavho,” vha amba.

Munwe wa dzi ṱhanzi we a hana u bulwa dzina uri vhadzulapo vhari vho neta nga vhugevhenga mivhunduni yavho. “Mavemu ndi kale vha khou tambudza vhadzulapo nga vhugevhenga havho. Ro neta nga vhugevhenga. Ri ṱoḓa u fhelisa vhugevhenga nga nḓila dzine ra kona. Ari koni u dzula ra lindela mapholisa hu si na zwine vha khou ita kana u ri thusa. U dzhia mulayo ra vhea zwanḓani zwashu ndi yone nḓila ine mavemu vha thetshelesa ngayo,” vha amba.

Muambeli wa tshigwada tsha Vhembe Concerned Group, Vho Phathutshedzo Ramabulana, vho kaidza vhadzulapo kha zwiito zwa u vhulaha mavemu sa nḓila ya u tandulula thaidzo dzine vha vha nadzo. “U dzhia milayo vha vhea zwanḓani zwavho ndi mulandu nga wone une, vhadzulapo vha fanela u lindela mapholisa vha tshi fara mavemu vha vha livhanya na tshanḓa tsha mulayo,” vha amba.

Mapholisa vha humbela uri ane avha na vhuṱanzi vhune ha nga thusa kha milandu iyi vha nga isa muvhigo tshiṱitshini tsha mapholisa tsha tsini kana vha founela muofisiri wa tsedzuluso Sgt Thendo Ravele kha 082 319 95558. Kana vha founela kha nomboro dza lushaka dza 08600 10111.

Date:05 December 2023

By: Kaizer Nengovhela

Kaizer Nengovhela started writing stories for Limpopo Mirror in 2000. Prior to that he had a five year stint at Phala-Phala FM as sports presenter. In 2005 Kaizer received an award from the province's premier as Best Sports Presenter. The same year he was also nominated as Best Sports Reporter by the Makhado Municipality. Kaizer was awarded the Mathatha Tsedu award in 2014.

Read: 320