Mulamuleli uḓo imedzana na vhanwe vha khwine kha Miss Congeniality 2023

Tshiṱori nga: Kaizer Nengovhela. Ṱhalutshedzo nga: Khathutshelo Raliphaswa.

Mulamuleli Nemanganya wa minwaha ya fumbili-mbili a bvaho Tshikota o nangwa kha vha khwine vha Miss Congeniality 2023, uyo ndi muṱatṱisano wa vhathu vha tshilaho na vhuholefhal. Mulamuleli ane avha muholefhali wa maṱo ubva kha muṱa une vha shaya, hone vhoṱhe vha ḓi unḓa nga masheleni a gavhelo ḽawe ḽa vhuholefhali. Naho zwo ralo na vhuholefhali hawe, u na zwinzhi zwavhuḓi zwine a ḓi tamela vhutshiloni na u fulufhela uri uḓo nga ḽinwe ḽa maḓuvha u ḓo imelela vunḓu ḽa Limpopo kha muṱaṱisano wa Miss Afrika Tshipembe.

“Ndi tshila na vhuholefhali, fhedzi izwo a zwi nthivheli u bveledza ndoro dzanga. Ndi vhona uri vunḓu ḽashu ri na ṱhahelelo zwi tshi ḓa kha u maanḓafhadza vhafumakadzi na vhathu vhane vha tshila na vhuholefhali, ndi ngazwo ndi tshi ṱoḓa u ṱuṱuwedza vhafumakadzi na vhaholefhali uri vha ḓi imelela na zwine vha tenda khazwo. Vha si hangwe u tikedzana kha zwine vha ita. Ri dovha hafhu ra ṱoḓa thikhedzo ubva kha miṱa yashu na vhathu vhare tsini na rine uri ri kone u bveledza vhutshila na mvelele zwashu,” a amba.

Mulamuleli o engedza uri vhabebi vhane vha vha na vhana vha vhasidzana vhane vha vha vhaholefhali vha fanela uvha na mbonela phanḓa na mihumbulo yo ṱanḓavhuwaho musi vhana vhavho vha kha nḓowetshumo ya zwa vhonyalunako. “U ṱuṱuwedza havho vhana zwi ḓovha ṱuṱuwedza uri vha tevhele ndoro dzavho. Hezwi zwi ḓovha na mbuyelo dza khwine sa izwi vha tshi ḓo engedza zwikhala zwa mishumo na u alusa ikonomi ya shango. Sa izwi vhathu vha songo neiwa u fana kha sia ḽa pfunzo, vhabebi vha fanela u pfesesa uri vhana vhavho vha nga shumisa vhutsila na vhukoni havho u i bveledza,” a amba.

U khethwa sa vhanwe vha khwine kha muṱaṱisano uyu ndi zwine aḓi hudza ngazwo; vhanzhi vha tou tama uzwi swikelela. “Kha nne zwi amba zwithu zwinzhi. Ndi wana tshikhala tsha u bveledza vhutsila na vhukoni hanga. Minwe ya miḽoro yanga yo wedza nga u khethwa sa munwe wa vha khwine kha muṱaṱisano wa Miss Cingeiality 2023. Ndi tsumbo yauri a zwina ndavha uri muthu u bva gai kana nyimele yoitisaho hani kana yo imaho hani, zwoṱhe zwia konadzea,” a vhina.

Muṱaṱisano uḓo farelwa Ṱhohoyanḓou nga ḽa ṱahe Nyendavhusiku, hone Mulamuleli o ḓala nga dakalo o lindela ḓuvha iḽo. Zwa zwino Mulamuleli u khou nyangana na vhalambedzi vhane vha nga mu lambedza nga rokho, tshiendedzi na mavhudzi na zwinakisi, zwine zwa swika masheleni a zwigidi zwiṋa.

Date:06 December 2023

By: Kaizer Nengovhela

Kaizer Nengovhela started writing stories for Limpopo Mirror in 2000. Prior to that he had a five year stint at Phala-Phala FM as sports presenter. In 2005 Kaizer received an award from the province's premier as Best Sports Presenter. The same year he was also nominated as Best Sports Reporter by the Makhado Municipality. Kaizer was awarded the Mathatha Tsedu award in 2014.

Read: 247