Mme oḓi vhonadza khothe malugana na u laṱa lushie.

Tshiṱori nga: Thembi Siaga. Ṱhalutshedzo nga: Khathutshelo Raliphaswa.

Mufumakadzi wa minwaha ya furaru-iṋa oḓi vhonadza khothe ya madzhisiṱiraṱa wa Waterval malugana na u humbulelwa uri o laṱa ṅwana wawe wa lushie ngomu ha mulindi wa bunga. Tshiwo itsho bvo bvelela kusini kwa Vhuṱuwangadzebu khala Mpheni tsini na Elim. Mufumakadzi uyo u ḓivhea nga ḽa Hlanganani Maluleke, o vhudza vhathu uri o xetshelwa nga ṅwana a tshe muimana, naho ovha muimana lwa minwedzi ya ṱahe.

Tshiwo itsho tsho bvelela nga Lavhuvhili, ḽa fumbili-malo Lara. Munwe wa vhadzulapo vho ḓou vhigela mapholisa. Vhori u swika vha ṱangana na masinḓambilu musi vha tshi livhiswa mulindini wa bunga he tshitumbu tsha lushie tsha wanala hone. Nga u gidimisa tshifhinga, vha lingedza u wana thuso ya ṱereṱere kha vha masipala wapo, he vha kona u bvisa tshitumbu tsha lushie.

Tshitumbu itsho tsho ḓou iswa mutsharani wapo wa muvhuso u ṱoliwa na u bvela phanḓa ha tsedzuluso dza mapholisa. Muambeli wa mapholisa kha tshiṱiriki tsha Vhembe, Vho Vuledzani Dathi vho khwaṱhisedza tshiwo itsho. “Muhumbulelwa oḓi vhonadza khothe ya madzhisiṱiraṱa wa Waterval nga Lavhuṱanu, ḽa u thoma ḽa Nyendavhusiku, he a ṋeiwa beiḽi ya mahala. Zwo ralo u ḓoḓi vhonadza hafhu khothe iyo ṅwaha u ḓaho nga ḽa fumbili-ina Phando. Tsedzuluso dza mapholisa dzi khou bvela phanḓa,” vha amba.

Mudzulatshidulo wa khoro ya musanda wa Mpheni, Vho Charles Musekwa, vho ombedzela kha usa tikedza zwiito zwobva zwifanaho na izwi. “Ro shushwa nga tshiwo itshi ngauri mme a ṅwana o amba nga ha u xetshelwa nga ṅwana a sa athu u bebwa. Sa khoro, ri lwa na zwiito zwine mme avha a khou humbulelwa uri o zwi ita,” vha amba.

Vho Joshua Kwapa, muambeli wa muhasho wa mveledziso ya tshitshavha Limpopo, vho ita khuwelelo kha vho mme vhothe uri vha dzulele u ṱoḓa thuso kha vhaḓivhi u fana na social worker. “Vhaḓivhi vha a kona u tikedza na u eletshedza. Vhutshilo ha ṅwana ndi hone ha vhuṱhogwa. Arali muthu a khou balelwa, vha nga kona u wana thandululo na tsivhudzo dzo fanelaho ṱhoḓea dza ṅwana na tsireledzo yawe,” vha amba.

Date:08 December 2023

By: Thembi Siaga

Thembi Siaga started as an intern during 2021. He assisted with video photography and editing. He also produced numerous small documentaries, focusing on the Vhembe region and its people. Currently he works as a freelance journalist, covering stories in the Elim area.

Thembi studied at the Tshwane University of Technology, where he completed his diploma in Journalism in 2021.

Read: 263