Tshikolo tsha Madzikuse tsho tshinyadzwa nga maḓumbu.

Tshiṱori nga: Silas Nduvheni. Ṱhalutshedzo nga: Khathutshelo Raliphaswa.

Dumbu madzikule na dzi mvula khulu zwezwabvelela nga Lavhuraru ḽa fumbili-ṱahe zwo sia vhagudiswa vha tshikolo tsha Madzikuse tsha fhasi ngei Hatshikonelo, nnḓa nyanaha Ṱhohoyandou vha tshi kombetshedzea u ṅwala milingo yavho fhasi ha miri. Izwi ndi ngauri ṱhanga dza phera dza u gudela dzo pfuḓuluwa na u tshinyadzwa.

Mudzulatshidulo wa komiti ya ṱafula ḽa pfunzo Hatshikonelo, Vhamusanda Mudzulathungo Mmbi, vhari vho ḓivhadzwa nga ha tshinyalelo iyo nga ḓuvha ḽi tevhelaho. Ndi he vhari vha tshi swika vha wana uri phera idzo dzo tshinyala lune a dzingo lugela uri vhagudiswa vha ṅwale hone milingo yavho. Vhari: “Nga murahu ha u ṱola lwo linganaho, ro ḓou dzudzanya ripoto ra wana uri ṱhanga yo tshinyadzwa. Khavhele dza muḓagasi dzovha dzo tshinyala lwe dzavha dzo bvela khagala, ngeno mbondo dzo thathaba. Ari athu u vhona tshinyalelo nngafha ya maḓumbu kha muvhundu washu lwa tshifhinga tshilapfu. Haya ndi masinḓambilu kha vhagudisi na vhagudiswa.”

Vho Mmbi vhari ndi kale vha tshi ṅwalela vha muhasho wa pfunzo nga ha zwikolo zwine zwa ṱoḓa u lugiswa kha dzi tshinyalelo, fhedzi ahuna zwe zwa lugiswa. Uya nga Vho Mmbi, dzinwe dza dzi phera dza u gudela ndi dze dza fhaṱwa nga zwidina zwa mavu murahu nga minwaha ya gidiḓaṱahe furathi.

Mudzulatshidulo wa khoro-mbusi ya tshikolo tsha fhasi tsha Madzikuse, Vho Mashudu Masera, vhari vhovha vho shushwa nga tshiwo itsho. “O touvha mashudu mavhuya uri maḓumbu ayo o thoma vhagudiswa vho no ya hayani, zwo ralo ahuna we a huvhala,” vha amba.

Vho Masera vhari zwine zwa vha vhilaedza zwa zwino ndi uri vhanwe vha vhabebi vha vhana vhane vha dzhena afho vha nga pfulusa vhana u bva kha tshikolo itsho.

Muambeli wa muhasho wa pfunzo Limpopo, Vho Matome Moremi, vhori vha tshe vho lindela ripoto ubva kha vha ofisi dza pfunzo dza tshiṱiriki tsha Vhembe vha sa athu u amba na vha nyanḓadza mafhungo, fhedzi zworalo vho fulufhedzisa vha Limpopo Mirror uri vha ḓo vha ḓivhadza arali vha wana vhunwe vhuṱanzi.

Date:08 December 2023

By: Silas Nduvheni

Read: 253