Vhadzulapo vho sala na nyofho nga murahu hau wanala tshitumbu ḓakani

Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.

U wanala ha tshitumbu tsha Vho Rosina Ramasimu, vha minwaha ya furathi vha bvaho Hamanavhela zwo sia vhadzulapo vhe na nyofho, vha tshi ofha uri muiti kana vhaiiti vha zwiito izwi zwa tshiṱuhu u khou tshimbila vhukati havho ḓuvha ḽinwe na ḽinwe. Hone vhafumakadzi vha muvhundu uyo vho kaidzwa uri vha songo tshimbila maḓakani heha wanala tshitumbu tsha mufumakadzi avho.

Zwa zwino ahuna ane a ḓivha uri ho bvelela mini nga Ḽavhuna ḽa iṋa Ḽambamai. Vhamusanda vha muvhundu uyo, Vho Jeremia Murovhi, vhari Vho Ramasimu na munwe mufumakadzi vha bvaho kha muvhundu muthihi vhovha vho ya u reḓa khuni kha maḓaka a tsini. Izwi ndi zwithu zwe vha vha vha tshi dzulela u ita lwa minwaha, zwihulu nga murahu hau fhira shangoni ha munna wavho nga ṅwaha wa 2019. Vhovha vha tshi reḓa khuni dzau shumisa hayani na dzau rengisa uri vha kone u unḓa muṱa wavho.

Nga mathabama a ḓuvha ḽe tshiwo tsha bvelela nga awara ya vhurathi, ho ḓou vhuya mufumakadzi vhe vha vho ṱuwa na Vho Ramasimu u reda khuni, vhe vha vha vho ḓala nga nyofho na nḓado. Vho ḓou lingedza u amba zwe zwa itea fhedzi vha balelwa u zwi vhea zwavhuḓi nga hone uvha vho ḓalelwa nga u ofha nau ḓaḓa. “Ndi he vhadzulapo vha thoma fulo ḽau ṱoḓa Vho Ramasimu. Vha tshi tevhela zwiṱukuṱuku zwe avho mufumakadzi vha amba vho ḓou wana tshitumbu tsha Vho Ramasimu vho bvulwa zwiambaro tsini na mulambo. Mapholisa vho ḓou vhidziwa he vha swika na vha tshumelo dza shishi vhe vha bula Vho Ramasimu muthu o lovhaho na zwenezwo. Nga ḓuvha ḽitevhelaho, vhadzulapo vho ḓou humela ḓakani afho vhe kha fulo ḽau ṱoḓa zwiambaro zwa Vho Ramasimu. Vho ḓou wana zwiambaro zwavho zwo fhisiwa nṱha ha tombo ḽe ḽavha ḽi si kule na he tshitumbu tsha wanala hone. Zwe zwa wanala hovha mukapu wavho zwe zwavha tswayo yauri tshiwo tsho itea nga matsheloni,” Vho Murovhi vha amba.

Vho Murovhi vho engedza ḽauri mufumakadzi avho vho lovha nga tshikhudamuya sa izwi ho wanala labi ngomu mulomoni wavho. Zwovha zwi tshi sumbedza uri vho tou iswa afho he ha wanala tshitumbu, tshitumbu tshavho tshovha tsho ḓala dzi mbonzhe. Vhari tshiwo itshi tsho shusha vhadzulapo zwihulu vhafumakadzi sa izwi tsireledzo yavho vha tshi ya u reḓa khuni hovha hu si zwithu zwine zwa vhilaedza kale.

“Ro kona u fara muṱangano sa vhadzulapo nga Mugivhela, he ra dzhia tsheo yau thusa nau tikedza vha muṱa nga mbulungo. Ri dovha hafhu ra ita khuwelelo kha vhafumakadzi vhothe uri vha songo tshimbila ḓakani vhe vhoṱhe vha tshi ya u reḓa khuni,” ha engedza.

Muraḓo wa muṱa, Vho Khathutshelo Ramasimu, vhari vho vhaisala sa muṱa nga tshiwo itshi. “Vhovha vhe muundi wa muṱa wavho, hone zwa zwino ari ḓivhi uri naa vhana vhavho vhaṱanu vha ḓo unḓiwa nga mini. Vhovha vho thoma u wana gavhelo ḽavho ḽa vhaaluwa. Hone hovha hu si kale vho ntsevhela zwauri vhovha vha khou fhedza mbadelo dzavho, hone maḓuvha avho a u reḓa khuni ovha a tsini nau fhela sa izwi muvhuso wovha u khou vha thusa kha u ṱhogomela vhana vhavho. Ri khou lila sa muṱa fhedzi ri khou livhuwa thikhedzo ine ra khou i wana ubva kha vhathu vho fhambanaho,” vha amba.

Muambeli wa mapholisa Limpopo Col Malesela Ledwaba vho khwaṱhisedza tshiwo, vhari vho thoma fulo ḽau zwimana na vhapondi Kana mupondi khatshiwo itshi. “Mupondiwa vho waniwa vha si na zwiambaro, fhedzi vho pangiwa labi ngomu mulomoni,” vha amba.

Ane avha na vhuṱanzi kana zwidodombedzwa zwine zwa nga thusa kha mulandu uyu vha nga founela muofisiri vha ṱhoḓisiso kha mulandu uyu, Sgt Muthelo Meregi, kha nomboro dza 082 755 6895 kana musedzulusi vha tsini kha nomboro dza 072 149 5581. Kana vha founela nomboro dza lushaka dza u thivhela vhugevhenga dza 08600 10111.

Date:12 April 2024

By: Elmon Tshikhudo

Elmon Tshikhudo started off as a photographer. He developed an interest in writing and started submitting articles to local as well as national publications. He became part of the Limpopo Mirror family in 2005 and was a permanent part of the news team until 2019.

Read: 216